§ 1. Alt fråvær skal meldast til skolen. Som hovudregel skal elevar melde fråvær i InSchool.
Eleven eller foreldra skal melde om fråvær til kontaktlærar første fråværsdag. Må eleven forlate skolen grunna sjukdom eller andre årsaker, skal kontaktlærar eller faglærar ha beskjed.
Elevfråvær skal førast fortløpande av faglærar. Det skal førast fråvær for heile undervisningstimar. Er eleven borte heile dagen, skal timefråværet gjerast om til heildagsfråvær.
Elevar som kjem for seint har rett til å delta i opplæringa. Oppmøte etter at undervisningstimen har starta blir som hovudregel registrert som merknad om forseintkomming. Viss eleven går frå timen etter oppmøte, og blir meir borte enn til stades, kan lærar registrere fråvær. Det skal ikkje registrerast fråvær for undervisningstimen når eleven får merknad om forseintkomming. Fleire merknader kan føre til nedsett ordenskarakter.
Viss forseintkomminga skuldast forhold som er utanfor eleven sin kontroll, som for eksempel at bussen er forsinka, skal ikkje eleven ha merknad og det skal ikkje førast fråvær.
Ved særlege tilfelle, for eksempel aktivitetar som ekskursjonar og skidagar, vil det vere mogleg å føre fråvær i minutt.
§ 2. Fråværsgrensa i vidaregåande skole er på ti prosent av årstimetalet i eit fag. Elevar i vidaregåande skole som har meir enn ti prosent fråvær, kan ikkje få standpunktkarakter i faget eller halvårsvurdering med karakter ved slutten av skoleåret i fag som går over fleire skoleår.
Eleven har ansvar for å legge fram eigenmelding, dokumentere eller på annan måte gjere greie for fråværet til sin kontaktlærar. Eleven kan også legge fram eigenmelding som er skreve av foreldra eller foreldra kan legge fram eigenmelding på vegne av eleven. Ved planlagt fråvær bør eleven melde om fråværet på førehand.
Eleven kan levere eigenmelding for fråvær av helsegrunner opp til fråværsgrensa på ti prosent. Når eleven har nådd grensa på ti prosent fråvær i eit fag (ved helserelatert og udokumentert fråvær samanlagt), må eleven dokumentere ytterlegare helserelatert fråvær med dokumentasjon frå helsepersonell.
Fråvær som ikkje er meldt blir ført som udokumentert fråvær, og rekna inn i fråværsprosent i fag. Udokumentert fråvær kan ikkje vere over ti prosent. Udokumentert fråvær kan føre til nedsett karakter i orden eller oppførsel.
Elevar som har høgare risiko for helserelatert fråvær, kan likevel leggje fram eigenmelding etter at ti prosent er nådd dersom dette er dokumentert av helsepersonell. Eksempel på dette kan vere kronisk eller langvarig sjukdom. Dokumentasjon frå helsepersonell bør leggast fram så snart som mogleg.
Det er ikkje krav om at dokumentasjonen skal gi skolen informasjon om kva for helseplager eleven har. Det held at dokumentasjonen stadfestar at fråværet skuldast sjukdom eller andre helseforhold.
§ 3. Eleven må følge med på eige fråvær, og melde frå om eventuell feilføring til faglærar/kontaktlærar. Eleven må også melde frå til kontaktlærar om timefråvær som skal gjerast om til heildagsfråvær. Hovudregel er at melding om feilføring og omgjering av fråvær skal bli gitt innan 2 veker etter fråværsdato.
§ 4. Sluttar eleven i eit fag, skal fråvær førast fram til registrert sluttdato. Bytter eleven fag, skal fråvær i tidlegare fag ikkje følgje med. Det same gjeld elev som skiftar skole.
§ 5. Blir det gitt opplæring i fleire fag samtidig, skal elevane vere kjent med kva fag det blir gitt opplæring i. Eksempel kan vere ekskursjonar, tverrfaglege undervisningsopplegg, fagdagar og liknande. Fråvær vil bli knytt til faga aktivitetane er lagt til.
§ 6. Fråvær som skuldast sjukdom eller andre helseforhold
Fråvær på grunn av «sjukdom eller andre helseforhold» kan for eksempel vere sjukdom, skade, legetime, tannlegetime, time hos BUP eller liknande. Besøk hos skolehelsetenesta er rettigheitfråvær, sjå § 10.
Det er ulike regler for dokumentasjon for fråvær som skuldast sjukdom og helseforhold og fråvær som skuldast andre grunnar (sjå § 7), jf. opplæringsforskrifta § 9-8 andre ledd.
Fråvær på grunn av «sjukdom eller andre helseforhold» kan for eksempel vere sjukdom, skade, legetime, tannlegetime, time hos BUP, avtale med skolehelsetenesta eller liknande.
Eleven kan levere eigenmelding for fråvær som skuldast helseforhold i opptil ti prosent av timane i eit fag. Dette inneber at eleven kan forklare fråværet utan å oppsøke helsepersonell. Eigenmelding som dokumentasjon på helserelatert fråvær gjeld opp til ti prosent. Unntak gjeld for elevar som har høgare risiko for helserelatert fråvær, sjå § 2.
Har eleven nådd fråværsgrensa, må eleven legge fram dokumentasjon frå helsepersonell ved meir helsefråvær for å få unntak frå fråværsgrensa. Det betyr at dokumentasjon frå helsepersonell først får betydning ved fråvær som overstig ti prosent.
Sjølv om dokumentasjon frå helsepersonell først får betydning for helserelatert fråvær som overstig ti prosent, må skolen ta imot det eleven leverer som dokumentasjon. Oppbevaring av dokumentasjon skal vere i samsvar med skolen sine rutinar. Dokumentasjonen kan ha betydning for fråværet på vitnemålet.
§ 7. Fråvær som skuldast andre årsaker
Viss eleven har fråvær som skuldast ein av følgande årsaker og kan dokumentere dette, vil fråværet ikkje telle med i fråværsgrensa:
- velferdsforhold, som for eksempel alvorleg sjukdom i familien, gravferd, omsorgsoppgåver for eigne barn, konfirmasjon
- andre religiøse høgtidsdagar enn dei offentlege heilagdagane, avgrensa til to dagar, jf. trossamfunnsloven § 18
- lovpålagt oppmøte, som for eksempel innkalling til rettssak, vitne i rettssak, sesjon
- arbeid som tillitsvalt, som for eksempel representant i kommunen sitt ungdomsråd, deltaking på møte eller anna arbeid i Elevorganisasjonen
- politisk arbeid, som for eksempel medlem i kommunestyret, Ungdommens fylkesråd, Ungdommens fylkesting, politiske utval på fylkesnivå, landsmøtedelegat for eit politisk parti, partirepresentant i skoledebattar
- hjelpearbeid, som for eksempel deltaking i leiteaksjonar via humanitære organisasjonar, deltaking i pålagde øvingar/trening til hjelpearbeid i humanitære organisasjonar
- tryggleikskurs på bane, andre og tredje del av tryggleikskurs på veg og førarprøve for klasse B (både teoretisk og praktisk førarprøve), jf. trafikkopplæringsforskrifta §§ 11-6, 11-8 og 30-2.
- representasjon på arrangement på nasjonalt og internasjonalt nivå, som for eksempel deltaking på ulike idrettsarrangement/meisterskap/stemne, deltaking på konsertar, kunst- eller kulturarrangement
Unntak frå fråværsgrensa gjeld ikkje for andre delar trafikkopplæring enn dei som er nemnt under bokstav h. Unntak gjeld ikkje for anna type trafikkopplæring enn til klasse B.
Desse årsakene er identiske med dei som gjeld for fråvær som kan bli unntatt frå føring på kompetansebevis og vitnemål, sjå § 11.
§ 8. Rektor sjølv kan avgjere at ein elev som til saman har opp til femten prosent eigenmeldt eller udokumentert fråvær i eit fag, likevel kan få karakter dersom årsaka til fråværet gjer det klart urimeleg at fråværsgrensa skal gjelde. Faglæraren må i alle høve ha tilstrekkeleg grunnlag for å gi karakter, jf. opplæringsforskrifta § 9-1.
§ 9. Elevar skal alltid ha skriftleg varsel straks det er fare for å ikkje få vurdering med karakter i eit fag, jf. opplæringsforskrifta § 9-7. Dersom eleven ikkje er myndig, skal også foreldra/føresette varslast. Varsel skal sendast i god tid. Hensikta med varselet er at eleven framleis skal ha moglegheit til å få halvårsvurdering med karakter eller standpunktkarakter i faget.
Dersom ein elev har fått varsel etter opplæringsforskrifta § 9-7 og ikkje kan få standpunktkarakter i eit fag, skal rektor gjere enkeltvedtak om at det ikkje blir gitt standpunktkarakter i faget, jf. opplæringsforskrifta § 9-16. Før det blir gjort enkeltvedtak bør eleven få anledning til å legge fram dokumentasjon for fråværet.
Enkeltvedtaket skal vere skriftleg og sendast til eleven. Enkeltvedtaket skal også sendast til foreldre/føresette viss eleven ikkje er myndig. Informasjon om moglegheit til å klage skal følgje med. Ei eventuell klage skal sendast til skolen.
§ 10. Er eleven borte frå opplæringa grunna ein rettighet dei har etter opplæringslova, skal ikkje fråværet telle med i fråværsgrensa. Slikt fråvær kan for eksempel vere:
- rådgiving på skolen/avtale med rådgivar
- samtale/avtale/besøk hos skolehelsetenesta
- utredning som blir gjennomført av PP-tenesta og/eller Statped
- organisert studiearbeid som er avtalt med faglærar i forkant
- elevrådsarbeid, skoleadministrativt arbeid og deltaking på elevting i regi av Elevorganisasjonen og liknande, som er godkjent av skolen
- avtalt samtale med rektor eller andre tilsette
- intervju til læreplass
- særskilt, ny og utsett eksamen. Viss eleven ikkje møter til eksamen skal det bli ført fråvær.
- privatisteksamen, viss den inngår i fagvalet til eleven og eleven treng eksamen for å få vitnemål
- opplæring i heimen eller på institusjon på grunn av langvarig sjukdom eller liknande. Dette blir rekna som ein del av den ordinære opplæringa og blir derfor ikkje rekna som fråvær.
- dersom fråvær frå opplæringa skuldast situasjonar/forhold som openbart ligg utanfor eleven sin kontroll, for eksempel forsinka kollektivtrafikk, kan rektor avgjere at det likevel ikkje skal førast fråvær.
Feriereiser skal reknast som fråvær, og kan ikkje avtalast som organisert studiearbeid.
§ 11. Ein elev kan krevje at opp til ti fråværsdagar i løpet av eit skoleår ikkje blir førte på vitnemålet eller kompetansebeviset, dersom det blir lagt fram slik dokumentasjon som er nemnd i § 7.
Krav med tilhøyrande dokumentasjon bør komme frå eleven snarast mogleg etter fråværet.
Fråvær på grunn av sjukdom eller andre helseforhold må ha vart i meir enn tre dagar for ikkje å bli ført på vitnemålet eller kompetansebeviset, og det er berre fråværet frå og med den fjerde dagen som kan strykast. Dersom ein elev har ein dokumentert høgare risiko for helserelatert fråvær, kan fråværet likevel strykast frå og med den første fråværsdagen som nemnt i § 2.
§ 12. Eleven kan krevje at årsaka til fråværet blir ført på eit vedlegg til vitnemålet eller kompetansebeviset, jf. opplæringsforskrifta § 9-53 tredje ledd.